آرت ثيرابي ليكوا ولحبايبكوا من رفاه
كتير من وقتنا بيروح على الموبايل واحنا موجودين وسط مجموعات الأمان الخاصّة بينا، سواءً كانت أهل أو أصحاب أو شركائنا العاطفيّين، وتواجدنا لمدّة طويلة على السّوشيال ميديا، مثلًا، واحنا وسط مجموعاتنا دي، ليه تأثير سلبي وبيزيد من حجم القلق والتّوتّر.
ليه بنحاول ندخّل الرّفاه النّفسي من خلال المداواة بالفنّ في حياتنا مؤخّرًا؟
لأنّ الفن تمرين حِسّي، واحنا كبشر بنخزّن الأفكار جوّانا بالكلام ولكن عواطفنا ومشاعرنا بتتخزّن في شكل صور، وأغلب الوقت مش بيكون عندنا المساحة الكافية إنّنا نشوف الصّور دي أو حتّى نعبّر عنها وسط مجموعات الأمان الخاصّة بينا؛ علشان كده لما بنخرّج الصّور دي من جُوّانا وسط مجموعاتنا بنوصل لحاجات كتير، أهمّها:
١- تقليل التّوتُّر
٢- تقدير الذّات
٣- تحسين الثّقة بالنّفس وبالآخرين
٤ - التّعامل مع المشاعر الصّعبة وانتقالات الحياة
٥- التّواجد والتّواصل مع مجموعاتنا
علشان كده ممكن نستفيد بجزء من وقتنا مع مجموعاتنا، ونتشارك في عمل إبداعي حرّ بدون قيود أو أحكام مُطلَقة، ونقدر نوصل لتواصل مع ذواتنا كأفراد ومع بعض كمجموعة…
هنذكر بعض الأنشطة البسيطة اللي ممكن نشاركها مع مجموعاتنا أو شركائنا:
١- الماندلا
هي مساحة تعبير صامتة من خلال الألوان، بيتشارك فيها أفراد المجموعة في تلوين لوحة من الماندلا، كل شخص بيلوّن من المكان المقابل ليه وفي النّهاية بتكون اللّوحة مزيج من مشاعر وأفكار وعواطف مختلفة. الهدف من التّمرين ده هو توفير مساحة من الهدوء والتّركيز وتقليل القلق والتّوتّر، وده بيساعدنا في طرد المشاعر السّلبيّة اللي جوّانا.
٢- تواصل جسدي
أجسامنا كبشر بتحتاج تعبّر عن وجودها في المجموعات الخاصّة بينا علشان التّواصل يتمّ بمستوى أعلى بينّا كأفراد، وده ممكن يحصل بأكتر من طريقة بعد الموافقة المُسبَقة على التّلامُس بين أفراد المجموعة. ممكن نمسك إيدين بعض واحنا بنحكّي عن يومنا بشكل بسيط، ونسمع بعض بدون تعليق أو إطلاق أحكام.
- الموسيقى مهمّة جدًّا في أيّامنا كأفراد وكمجموعة أو شركاء، علشان كده ممكن نرقص سوا أو نحرّك أجسامنا في المساحة الأمان لينا مع المجموعة، وده بيخلق أُلفة وتواصل وحرّيّة بين الأفراد.
٣- سلّة الورق
في التّمرين ده كلّ فرد من المجموعة بيكتب كلمة أو جملة بلون هو بيختاره، وبنطبّق الورق ونلخبطه، وكل حد بيختار ورقة ويتكلّم عنها وإزّاي شاف الكلمة أو الجملة دي بطريقة سلبيّة أو إيجابيّة ولونها حسّسه بإيه، وهكذا حتى كلّ الأفراد يشاركوا؛ وده بيساعد الأفراد يشوفوا أحاسيس الآخرين عن كلامهم اللي كتبوه في الورق، وبيفيد في بناء الثّقة ما بينهم.
٤- تمرين لعب الأدوار
كلّ فرد في المجموعة بيفترض وجود شخصيّة وهميّة ويحدّدلها مشكلة، وبيطلب النّصيحة من باقي أفراد المجموعة. الهدف من التّمرين ده إنّنا نحطّ نفسنا مكان الآخرين وده بينعكس على نظرتنا لأنفُسنا كأفراد، وعلى مستوى المجموعة هوّ بيعزّز التّفاعل بين أفراد المجموعة أو بين الشُّركاء وبيوفّر مساحة من التّفكير في القضايا المختلفة بدون إطلاق الأحكام.
مهمّ جدًّا توفير جزء من وقت المجموعة بشكل دوري لمشاركة تمرين أو شيء ما بيساعد على استقرار المجموعة وتوازنها وتواصلها بشكل أفضل على المدى البعيد، وبيزيد من التّفاهم بين الأفراد.
دي اقتراحات مزّيكا مختلفة ممكن نستخدمها أثناء أداء التّمارين:
وانتو لو عندكم حاجات بتعملوها في مجموعاتكم بتحسّن من رفاهكم النّفسي، شاركونا بيها!
اقرأ أكثر
Featured
